Payapa daw ang Bulacan, ayon sa pulisya

Para kay Police Senior Supt. Fernando Mendez (kaliwa), direktor ng pulisya sa Bulacam payapa ang lalawigan.

MALOLOS—Sa pangkalahatan, payapa ang Bulacan, ayon sa pulisya; ngunit nagpahayag naman ang military ng pagpapaigting sa kampanya laban sa mga rebeldeng komunista.

Para naman kay Gob. Wilhelmino Alvarado, dapat magpulong ang Provincial Peace and Order Council (PPOC) ng Bulacan ng apat na beses sa loob ng isang taon upang matugunan ang lumalalang insidente ng kriminalidad.

Ito ang magkakahiwalay na pahayag ng mga pinuno sa lalawigan kaugnay ng unang pulong ng PPOC sa tong ito na ipinatawag ni Alvarado dahil sa tumataas na insidente ng mapangahas na krimen sa Bulacan na ayon sa kanya ay “isang insulto sa kakayahan gobyerno.”

Ayon kay Senior Supt. Fernando Mendez, Bulacan police director, bumaba sa 14,155 ang ang bilang ng krimen na naitala sa lalawigan noong 2011, kumpara sa naitalang 20,202 noong 2010.

Binanggit din niya na tumaas 3.70 porsyento ang crime solution ng pulisya sa taong 2011 kumpara sa naitalang 8.50 porsyento noong 2010.

Ayon pa kay Mendez, bumaba rin sa 1,802 ang naitalang krimen sa lalawigan sa unang dalawang buwan ng taon kumpara sa 2,943 bilang ng krimen sa lalawigan na naitala noong Enero at Pebrero 2011.

“Despite crimes committed in the province recently, Bulacan remains generally peaceful,” ani Mendez.

Iginiit niya na patuloy ang pagpapataas ng kakayahan ng pulis, bukod sa pagpapaigting ng pagpapatrulya sa mga pangunahing lansangan.

Bukod dito, hiniling din ni Mendez ang tulong ng kapitolyo para sa pagpapaunlad ng kakayahan at kagamitan ng mga kasapi ng Special Weapons and Tactics (SWAT) Group na tinawag din niya na “crisis group.”

Para namn kay Col. Hilario Lagnada ang kumander ng 56^th Infantry Battalion, higit nilang napahina ang puwersa ng remebleng komunista sa lalawigan.

Sinabi niya na sa kabila ng kakayahan ng mga rebelde na magsagawa ng mga partisan operation, hindi naman sapat ang kasanayan ng mga ito at nahihirapang maka-ingganya ng ngmga kasapi.

Ipinagmalaki ni Lagnada ang ilang engkwentro nila sa mga rebelde sa kabundukan ng Bulacan na nagbunga upang mabawasan ang sandatahang kasapi ng mga ito at sa pagkakatuklas ng mga imbakan ng baril noong nakaraang Pebrero 14. sa bulubunduking bayan ng Donya Remedios Trinidad.

Sa kabila naman ng pananagumpay na ito, iginiit ni Alvarado ang patuloy na pagtugis sa mga kriminal at mga rebelde sa lalawigan.

Ito ay dahil sa nagiging mapangahas ang mga kriminal sa kanilang paggawa ng krimen na karaniwang ginagawa kung araw.

“Hindi simpleng activity yan, hinihiya na nila ang gobyerno.  Insulto na sa kakayahan ng gobyerno ang mga criminal activities conducted on broad day light,” ani Alvarado.

Iginiit din niya na ang mas madalas na pagpupulong ng PPOC upang tuluyang masugpo ang kriminalidad sa lalawigan na naghahatid ng pangamba sa mga negosyante at mamamayan.