Tuesday, April 17, 2012

Escort ni Dominguez naputulan ng daliri



LUNGSOD NG MALOLOS – Nagkapira-piraso ang naputol na daliri ng isang jail officer na nag-escort kay Raymond Dominguez matapos aksidenteng pumutok ang kanyang baril.

Ito ay naganap ilang minuto bago muling ihatid sa Bicutan ang itinuturing na carnap king na si Dominguez, at halos 10-minuto matapos siyang hatulan ni Judge Wilfredo Nieves ng Regional Trial Court Branch 84 sa lungsod na ito ng 17 hanggang 30-taong pagkakabilanggo dahil sa kasong carnapping.

Ang jail officer ay nakilalang si Legazpi Cabatcha, 25, ng Mindanao Avenue, Project 8, Quezon City.

Batay sa pahayag ng mga saksi, nakikipagkuwentuhan ang biktima sa kapwa jail officer habang naghihintay ng pagbiyahe pabalik ng ng Camp Bagong Diwa sa Bicutan.

“Nagulat yung kasamang jailguard, napatakbo,” ani ng isang kawani ng RTC na humiling na huwag banggitin ang pangalan, “pati kami kinapa namin yung sarili namin baka may tama kami.”

Sinabi niya na inakala din umano niya na may iba pang tinamaan bandang alas-9:45 ng umaga ng Martes.

“Nagulat din yung naputukan, pero mas nagulat kami ng itaas yung kamay na dumudugo,” ani ng kawani.

Maging ang ibang kawani ng RTC ay nagulat din sa putok kaya’t sila man ay nagsidungaw sa mga bintana at naglabasan sa tanggapan.

“Akala namin ay si Raymond ang tinira,” sabi ng isa pang kawani ng korte na ayaw ding ipabanggit ang pangalan.

Si Cabatcha ay agad na isinugod sa Bulacan Medical Center at ayon sa mga duktor, ang naganap ay isang self accident.

Agad ding nilisan nina Cabatcha ang Bulacan Medical Center matapos malapatan ng lunas upang makaiwas sa mga mamamahayag na kumakapanayam sa abogado ni Dominguez ng pumutok ang baril ng jail officer.

Hatol kay Dominguez:17-30 taong pagkakabilanggo


 
MALOLOS CITY – Posibleng mabulok na sa bilangguan ang itinuturing na lider ng kilabot na carnap group na si Raymond Dominguez matapos na siya ay hatulan kahapon ng 17 hanggang 30-taong ng pagkakabilanggo.

Ito ay batay sa 11 pahinang desisyong inilabas ni Judge Wilfredo Nieves ng Regional Trial Court Branch 84 kung saan ay nahatulang guilty si Dominguez sa kasong carnapping.

Ngunit dinismis naman ni Nieves ang kasong robbery laban sa itinuturing na carnap king matapos na hindi ito mapatunayan sa korte ng prosekusyon.

Hinggil naman sa sinasabing dalawang kasabwat ni Dominguez, ang kasong carnapping ay ipina-archive ni Nieves hanggang sa maaresto ang mga ito upang muling buksan ang kaso.

Kaugnay nito, sinabi ni Jose Cruz, abogado ni Dominguez na iaapela nila sa Court of Appeals and nasabing desisyon.

Umaasa rin si Cruz na magiging paborable ang magiging tugon sa kanila ng CA dahil sa ang kasong robbery laban sa kanyang kliyente ay dinismis ng RTC.

Ito raw ay dahil sa hindi napatunayan ang pagkakakilanlan ng suspek.

Ang kasong carnapping laban kay Dominguez ay nag-ugat sa insidente ng carnaping sa Saog, Marilao noong Enero 14, 2010 kung saan ay inagaw sa isang Dante Escoto ang isang itim na Toyota Fortuner na may plakang ZGW-872 na nagkakahalaga ng P1.6-milyon.

Ayon kay Escoto, naghahanap lamang siya noon ng pamalit na matting para sa Fortuner na service vehicle ng lumapit ang tatlong lalaki na ang isa ay nakilala niyang si Dominguez sa isang police rogue photo gallery.

Bukod sa Fortuner, natangay din kay Escoto ang mga alahas, cash, laptop at iba pang kagamitan na nagkakahalaga ng P116,000.